Kinahanglan ipakita sa mga senador, ilabi na sa mayorya sa Senado, nga ilang ipalawig ang patas nga panglantaw sa mga ebidensya sa impeachment trial batok kang Bise Presidente Sara Duterte.
Namahayag si Norvin Gavino, interim president sa Young Free Workers, nga importante nga mapamatud-an sa mayorya nga lig-on ug epektibo ang sistema sa hustisya sa nasud pinaagi sa desisyon nga ibase gyud sa ebidensya ug dili sa politikal nga interes.
Dugang pa niya, kon mapakyas ang Senado sa pagpakita og patas ug klarong proseso, mahimo kining magmugna og pangutana sa publiko kabahin sa kredibilidad sa hustisya sa nasud.
Gipasabot usab ni Gavino nga kung kini mahitabo, siguradong mahimong argumento ang pagpadangat sa mga kaso batok kang former President Rodrigo Duterte ug Senador Ronald “Bato” dela Rosa ngadto sa International Criminal Court.
Busa, ang panawagan sa grupo mao nga ipakita sa Senado nga adunay “ngipon” ang justice system sa nasud pinaagi sa transparent ug ebidensya‑based nga paghusay sa impeachment.
