Mukabat sa ₱1.5 milyon ang gibanabanang structural damage sa dakong sunog nga miulbo sa residential area sa Barangay Lapasan ug St. John Puntod sa Cagayan de Oro sa miaging Lunes.
Matod ni BFP City Fire District PIO Capt. John Donasco, base sa ilang imbestigasyon nagsumikad ang kalayo sa residential nga bahin sa Lapasan, apan padayon pa ang imbestigasyon aron matino ang eksaktong hinungdan sa insidente.
Giingon pa ni Donasco nga tungod sa kahuot sa lugar ug mga istruktura nga nagabarog sa agianan, naglisod ang mga fire truck sa pagsulod sa sentro sa sunog.
Dugang pa niya nga ang ubang mga bombero napugos pagsulod pinaagi sa laing ruta tungod kay adunay mga balay nga nagasira sa dalan ug tulay sa lugar.Matod usab sa BFP, gi‑upgrade ang alarma ngadto sa 4th alarm tungod sa kadako sa kalayo ug sa kakusog sa pagkalapad niini.
Sa operasyon, miabot og 15 ka fire trucks gikan sa BFP ug 9 ka units gikan sa volunteer groups ang niresponde sa maong insidente.
Gi‑deklara nga fire out ang sunog bandang alas 4 sa buntag human madeklarar nga under control ang kalayo alas 2:30 sa kadlawon.
Padayon karon ang pag‑validate sa total nga kadaot ug sa tinuod nga pinanggikan sa sunog.
