CAGAYAN DE ORO CITY-Wala pa’y lead ang Bureau of Fire Protection o BFP sa pagkasunog sa duha ka balay sa Balingasag, Misamis Oriental kagabii.
Gibutyag ni BFP Balingasag Station investigator FO3 Herman Glen Jidalla nga nagsugod ang sunog sa balay ni Jocelyn Santiago ug paspas nga mikatap sa pikas balay nga iya ni Antonio Palafox.
Gibana-bana nga muabot sa 80-mil pesos ang damyos sa sunog.
Hinoon, walay natalang samaron o namatay sa insidente apan paspas nga gidala sa ambulansya si Santiago human gi-atake sa kasing-kasing samtang naglantaw sa pagdilaab sa iyang balay.
Samtang dawaton ni Antonio Palafox, usa sa mga nasunugan ang tabang nga ihatag kanila sa konseho sa Balingasag.
Una niini, gipamugos ni Palafox nga nadunggan niyang mibuto ang aircon nga iya sa iyang silingan nga si Santiago.
Gibutyag ni Palafox nga dili unta mahitabo ang sunog kung walay nagpasagad nga tawo sa ilang mga gigamit nga mga appliances.
