Photo credit: NMRAA supervisor Dr Raymond Antolo
CAGAYAN DE ORO CITY- Misakmit na sa unom ka gold medals ang mga atleta gikan sa Northern Mindanao Regional Athletics Association o NMRAA sa Palarong Pambansa 2019 didto sa Davao City.
Miingon si NMRAA Records and Documentation chairman Rodel Quitat nga kabahin sa mga dula nga nakakuha na’g gold medals ang swimming,taekwondo ug mismong athletics sa maong kompetisyon.
Dugang ni Quitat nga giila ang gold medalists nga sila si Lonel Sumatra sa dulang taekwondo gikan sa Cagayan de Oro;Jamaica Saligan sa 400 meter hurdle run sa Balingasag,Misamis Oriental ug Nemrod Montera gikan sa Ozamiz City.
Gawas niini,dugang gold medals ang nakuha sa atleta sa paragames diin kuwalipikado alang sa national competition ning tuiga.
Namahayag usab si Quitat nga madugangan pa ang gold medals alang sa NMRAA ilabina nga daghang atleta pa ang mohimo’g dula sa chess,taekwondo,basketball ug athletics.
Una niini,nag-una sa medal tally ang Western Visayas Regional Athletic Association sa ilang 16 ka gold;National Capital Region o NCR sa 15 ka gold medals;Region 4A sa ilang 11 ka gold medals,SOCCKSARGEN nga may 7 na ka gold medals ug Bicol region sa ilang unom ka medalyang bulawan.
