Mikutlo sa tolo ka kinabuhi ug dul-an dosena ang samaran sa gilusad nga operasyon sa kapulisan batok sa iladong drug gang sa Rio de Janeiro, Brazil.
Subay sa report, ang mga nakabsan pulos misukol sa engkwentro dihang mi-inisyar sa pagpamusil ang mga suspek sa raiding team
Sa engkwentro, usa ka pulis ug duha ka menor-de-edad ang angol human nakigpinusilay sa mga miyembro sa drug ring sa Morro do Timbau ug Baixa do Sapateiro sa amihanang bahin sa Rio.
Hisayran nga kapin 200 ka mga pulis ang gideploy sa operasyon aron maminusan ang presensya sa ilegal nga druga sa maong nasud.
Maoy target sa kapulisan ang Terceiro Comando Puro, usa ka gang nga aktibo sa daghang komunidad sa Rio.
Nakumpiska sa mga opisyal ang 12 ka rifle, walo ka pistola, granada, bala, magasin ug 83 kilo nga droga.
Nakarekober usab sila sa unom ka sakyanan.
Tungod sa bakbakan, naapektuhan ang mga serbisyo publiko, hinungdan nga 41 ka eskwelahan ang mipahunong sa klase ug upat ka primary care clinics ang temporaryong nagsira, sumala sa city officials.
Nagpabilin ang mga pulis sa lugar aron mangita pa sa armas ug ebidensya sa krimen.
