Gihatagan sa solemno nga “send-off ceremony” sa Police Regional Office – 10 ang mukabat sa 400 PNP Personnel aron magsilbing Special Electoral Board sa ilusad nga piliay sa Bangsamoro Autonomouse Region in Muslim Mindanao (BARMM).
Namahayag si Police Major Joann Navarro, ang tigpamaba sa PRO-10, nga gi-panalanginan kining grupo isip augmentation force sa rehiyon aron sila malayo sa katalagman ug masiguro ang ilang luwas nga pagbalik sa syudad human sa ilang misyon.
Gibutyag ni Navarro nga ang PNP-Comelec Task Force maoy mag-deploy sa pinili nga PRO-10 personnel sa mga polling precincts sa Lanao del Sur sa Mayo 12, ang adlaw sa eleksyon.
Kini nga puwersa gibansay ug maayo sa Commission on Elections (COMELEC) aron mohulip sa mga magtutudlo nga unang gitudlo nga muserbisyo isip Boards of Election Inspectors (BEIs).
Daghang mga magtutudlo ang misibog sa ilang tahas tungod sa kataas nga hulga sa kagubot sa probinsya, human nalakip sa listahan sa COMELEC isip election hot spot o red category.
Kini nga kategorya nagpasabot nga adunay grabe nga presensya sa kagubot nga dala sa private armed groups (PAGS) ug kasaysayan sa ihap sa mga politikong nangamatay tungod sa bangi sa pulitika.
Tungod sa maong sitwasyon, nakita sa PNP-COMELEC nga adunay taas nga panginahanglan sa dugang seguridad, aron masiguro ang luwas nga piliay sa rehiyon.
