CAGAYAN DE ORO CITY – Dili buhaton sa liderato sa 4th Infantry Division Philippine Army nga mangunay pagputol sa linya sa tubig ug koneksyon sa koryente sa 427 ka pamilya nga ipaubos sa demolasyon subay sa mando sa korte sulod sa Camp Edilberto Evangelista ning syudad.
Kini ang tubag ni 4ID spokesperson Lt Col Francisco Garello Jr batok sa espekulasyon nga gipakatag mogamit sa maong mga paagi ang mga sundalo aron mapugos paghawa ang mga residente sa duha ka lote nga nagsilbing military reservation sa dugay’ng panahon.
Namahayag si Garello nga bugtong gikuptan lang sa dibisyon ang kopya sa korte suprema nga naghatag pabor nga hukom kanila itandi sa mga residente nga naninggit usab sa kaangayan ug hustisya.
Siya miingon nga wala sa gahom sa 4ID ang pagpamutol sa linya sa tubig ug koryente kay dili kini sulod sa trabaho sa mga sundalo.
Apan miingon usab kini nga kon dunay pagtugot gikan sa court sheriff ang pagbugto sa mga linya sa koryente’g tubig aron lang mahawan ang maong gilantugiang mga lote,gawas na ang 4ID niini.
Gihmo ni Garello ang katin-awan nunot usab sa court order demolition nga ipatuman na sa sunod semana.
Dumduman nga dugay na unta kining ipatuman nga demolasyon apan tungod sa hangyo sa local govt units sa syuad ug lalawigan apil ang buhatan ni Cagayan de Oro 1st District Cong. Lordan Suan,misugot ang 4ID nga Hunyo na ipatuman ang kamanduan.
Nagsilbi nang land military reservation sa halos 90 ka tuig ang gi-okupahan sa maong mga pamilya nga gimanduan sa korte nga ipabalhin gawas sa Kampo Evangelista,Brgy Patag ning syudad.
Hisayrang si kanhi Pres. Manuel Quezon pa ang nagtumbok sa maong bahin sa kayutaan nga mahimong military reservation pinaagi sa iyang presidential proclamation nga gilugwa niadtong Marso 1937.
Gi-ralihan sa libuang katawhan ang liderato sa 4ID,Philippine Army gumikan sa gitakdang pagpatuman sa court demolition order sa duha ka tituladong yuta sulod sa Kampo Evangelista ning syudad.
