CAGAYAN DE ORO CITY-Nagpatuman sa class suspension ang unom ka lungsod sa Misamis Oriental ning adlawa.
Kini tungod sa nasinatiang kusog nga pag-ulan dala ni bagyong Urduja.
Matud ni Department of Education Misamis Oriental School Division Superintendent Dr. Cherry Mae Limbaco nga maoy gisuspenso ang klase sa Sugbongcogon, Talisayan, Claveria, Binuangan, Medina ug Initao.
Gihupay usab ni Limbaco ang kabalaka sa mga ginikanan nga maapektuhan ang pagtoon sa ilang anak tungod sa suspension of class kay anaa sila’y ipatuman nga make-up class matag adlaw nga Sabado sa tuig 2018.
Gitin-aw usab niya nga ila nang gipangandaman ang sunod-sunod nga mga class suspension ning bulana.
Matud pa niya, sayod na sila sa mga bulan nga sagad gabundakan sa kusog nga ulan.
Nanawagan na lamang si Limbaco sa ubang magtutudlo nga kinahanglang seguradohon ang kaluwasan ug seguridad sa mga magtutungha sa panahon sa ting- ulan.
