Milusad ang militar sa Russia og dakong pag-atake gamit ang 70 ka missile ug mga drone batok sa nagkadaiyang bahin sa Ukraine, nga miresulta sa pagkamatay sa labing menos 15 ka tawo ug pagkasamad sa daghan pang mga indibidwal.
Usa ka missile ang miigo sa lima ka andana nga residential building sa amihanang siyudad sa Pryluky, diin misaka ngadto sa 13 ang namatay, lakip niini ang upat ka mga bata, samtang 50 ka tawo ang nasamdan.
Matud sa Russia, ang mga pag-atake niini gitumong sa mga pasilidad sa military-industrial complex ug uban pang imprastraktura, samtang ang Ukrainian Air Force miingon nga kapin sa 80 porsyento sa 46 ka jet-powered drone nga gilunsad sa Russia ang ilang na-intercept.
Taliwala sa pag-atake, gibalik ni Ukrainian President Volodymyr Zelenskiy ang iyang panawagan alang sa dugang nga Patriot air defense systems, nga iyang giingon nga gikinahanglan aron mapanalipdan ang Ukraine batok sa hulga sa mga ballistic missile. (raniel mahunyag)
