CAGAYAN DE ORO CITY – Kasado na ang ipahigayong Nationwide HIV-Testing Day karong Mayo 26 ubos sa Department of Health (DOH) kuyog ang walo ka iladong advocacy groups nga nagboluntaryo aron mabatukan ang pagkaylap sa Human Immuno-Deficiency Virus kon HIV sa tibook Pilipinas. Ang tema sa maong kalihukan nag-uluha’g “This Is Me: Brave and Free”. Ang libre nga HIV-Testing gipanguluhan sa grupong LoveYourself, Inc., kuyog ang pito ka mga “partner organiztions”. Sa labing unang higayon, ilusad sa walo ka advocacy groups ang halapad, libre apan “confidential HIV test” sa Luzon, Visayas ug Mindanao sugod alas alas 11 sa buntag kutob alas 7 sa gabie. Ang laing pito ka mga advocacy groups milangkob sa Juan Positive Movement sa Mabalacat, Pampanga, Love Yourself Anglo sa Mandaluyong City, LoveYourself UniVictoria, Pasay City, HASH (HIV & AIDS Support House Inc.) sa Quezon City, DIOSSA (Decent Image of South Sign Assoc) sa Taguig City, CPAG (Cavite Positive Action Group) sa Cavite City, GAYON sa Legaspi City, Projet H-4 (Health, Help, Hope, Happines) sa Puerto Princesa, Kagay-an K-PLUS (Preserving Life Uniting Society) sa Cagayan de Oro City ug ang Olympus Society of Davao nga naka-base sa Davao City. Una niini, gibutyga sa DOH nga misaka pa sa 912 ka tawo ang nagpositibo sa HIV sulod lang sa bulan sa Marso. Kini gilangkoban sa 94% ka ihap sa mga lalaki ug 32% niini nagsumikad sa National Capital Region (NCR). Misaka sab sa 17% ang increase sa ihap sa mga people living with HIV kon PL-HIV’s sa CALABARZON, samtang 7% sa Central Visayas. Nanghinaut si LoveYourself Executive Director Ronivin G. Pagtakhan nga salmotan sa kadaghanang “nagduda” ang ilang libre nga HIV-Testing, ilabe na sa grupong MSM kon “men-having-sex-with-men”. Dinhi sa Cagayan de Oro, gibutyag ni Enrique Niño Patricio, ang chairperson sa K-PLUS nga bukas ang ilang team para sa libre test sa Pearlmont Hotel sa adlaw’ng Sabado, Mayo 26. Alang sa dugang mga detalye mahimong mubisita sa www.bitly.com/ThisIsMeInfo.

RELATED ARTICLESMORE FROM AUTHOR