CAGAYAN DE ORO CITY – Gipahamtangan sa Roads and Traffic Administration o RTA sa citation tickets ang 90 ka drayber nga nagpasagad pagparada sa ilang mga motorsiklo, motorela,bau-bao ingon man pribado ug publikong sakyanan palibot sa syudad.
Kini nunot sa gipakusog ni City Mayor Rolando ‘Klarex’ Uy nga kampanya nga mapaluag-luagan ang dalan aron dili mosamot ang suliran sa trapiko sa dakbayan.
Namayayag si RTA manager Engr. Nonito Oclarit nga gihatagan lang sa 72 oras ang mga tag-iya sa maong mga salakyan aron paghusay sa ilang kasupakan sa lagda trapiko.
Gibutyag niini nga mag-atubang sa kasong criminal kadtong mga tagp-iya nga nagpasagad ug wala kuhaa ang ilang mga salakyan subay sa ordinansa nga naila nga Traffic Code of Cagayan de Oro.
Mitapos kini sa pag-ingon nga kadtong wala pangsulbara nga tickets sulod sa 72 oras ang gilayon nang itugyan sa Land Transportation Office aron didto na manubag sa mas bug-at nga obligasyon ayha tugtan maka-renew sa ilang mga lisensya.
