CAGAYAN DE ORO CITY- Gipaubos karon sa state of calamity ang upat ka hinterland brgys nga sakop sa lungsod sa Opol,Misamis Oriental.
Kini human giingong mihimo sa paglusob ang gitoohang sakop sa rebeldeng New People’s Army o NPA diin nagresulta sa kahadlok sa 133 ka pamilya kapi’g 600 ka indibidwal.
Matud ni Opol Disaster Risk Reduction and Management Dept head Engr Rommel Lonoy nga gipalabang nila ang resolusyon nga nag-deklarar sa state of calamity sa Brgy Tingalan,Nangcaon,Cauyonan ug Limonda aron mapadali ang paghatag ayuda sa mga bakwit.
Sa pagkakaron,anaa sa Opol Elementary School ang mga biktima diin gitabanga’g atiman sa munisipyo ug provincial govt sa lalawigan.
Samtang gusto karon ni Gov Bambi Emano nga masuta kon matood nga rebeldeng New People’s Army o kinsa nga armadong pundok ang misulod sa upat ka brgy nga naghatag kalisang sa katawhan sa lungsod sa Opol ning lalawigan.
Kini aron mapangandaman pa’g maayo ang seguridad sa katawhan sa lalawigan ug mahikling ang mga pamilya nga maipit sa posibleng kagubot.
Namahayag si Misamis Oriental PDRRMD Exec Dir Fernando ‘Sotsot’ Dy Jr nga kanunay ang ilang koordinasyon sa militar ug kapolisan kabahin sa sitwasyon sa mga biktima sa maong lungsod.
Konektado lamang sa ultanan sa Lanao del Sur ingon man Bukidnon ang kabarangayan sa Cauyonan ug Limonda nga posibleng tinubdan sa armadong mga tawo.
Samtang,nang-recruit sa mga inosente nga sibilyan ang giingong 100 ka armadong pundok nga gikahadlukan sa gatusang mga sibilyan hinungdan nanghikling sila gikan sa bukiran sa Opol ning lalawigan.
Kini kon ugaling tinood nga sakop sa mga rebeldeng NPA ang nakit-an sa mga sibilyan sukad pa sa miaging Domingo.
Gibutyag ni PNP regional spokesperson Supt Lemuel Gonda pinakaunang higayon nga nakadawat sila’g report nga gisudlan sa armadong pundok ang kasadpang bahin sa lalawigan.
Gihulat nila ang kumpirmasyon sa intelligence community ug tropa sa RPSB-10 nga gikatag sa maong lungsod aron maabog ang armadong grupo.
