CAGAYAN DE ORO CITY-Idangop sa public utility committee sa konseho kang Pres Rodrigo Duterte ang pagbalewala sa pirmadong kontrata sa COWD ug Metro Pacific Water Corporation.
Kini human gikakurat nila ni Konsehal Bong Lao ang dakong presyo kada-cubic meter sa tubig sa MetroPac sa COWD nga ihatag sa mga konsumante sa syudad.
Imbitaron usab nila sila si Cong Rolando ‘Klarex’ Uy ug Cong Maximo ‘Maxi’ Rodriguez Jr sa sunod nga public hearing kabahin sa isyu.
Nabulgar nga P16.00 kada-cubic meter ang bayran sa COWD sa MetroPac itandi sa dul-ag 11 pesos lamang sa kasamtangang naka-kontrata sa Rio Verde Water Consortium.
Samtang atubangon sa kadagkuan sa COWD ang posibleng legal challenge nga himoon sa konseho nga nag-kuwestiyon sa pakig-kontrata ngadto sa Metro Pacific Water Corporation.
Gibutyag ni COWD Assistant General Engr Beivenido Batar Jr nga abli sila pag-atubang kon dad-on sa korte ang ilang hukom pakigkontra sa MetroPac.
Gipamugos ni Batar nga miagi sa ensakto nga proseso ang ilang pakig-joint venture sa Metro Pacific isip hulip sa Rio Verde nga gimando sa Commision on Audit nga bungkagon ang kontrata kay depektoso.
