CAGAYAN DE ORO CITY-Dead on arrival sa ospital ang customs police human mabulit sa mga buhing bala didto sa Baksuhan, Brgy Macasandig ning syudad kagabii.
Giila ang biktma nga si Roy Etuile Ancajas, 45 anyos ug lumad taga-Canbanta St., Mabolo, Cebu City.
Sumala ni SPO4 Paul Ragmac,imbestigador sa Scence of the Crime Operatives o SOC0-10 nga naka-angkon sa igo pinusilan sa tuo nga bahin sa dughan, hita ug walang tiil ang biktima hinungdan sa iyang kamatayon.
Gitakdang ipaubos sa otopsiya ang patay’ng lawas sa maong police officer samtang anaa pa sa ospital si customs officer Jo-ed Pasasadaba kinsa anaa sa talandugong kahimtang.
Dugtong niini,nasikop atol sa manhunt operation ang driver sa customs broker pipila ka oras gikan sa nahitabong pagpinusilay tali ni Roy Ancajas ug Jo-ed Pasasadaba diha sa Baksuhan,Brgy Macasandig ning syudad kagabii.
Gibutyag ni Sr/Insp Abdul Alim Sumandar,commander sa Macasandig Police Station nga maoy nasikop si Seigfred Roxas kinsa taga- Brgy Balulang ning syudad.
Nagtoo si Sumandar nga may kalabutan sa pagpamusil si Roxas kinsa mismo pa ang mitug-an nga gilabay niini ang armas sa kasagbutan human sa pinusilay nila ni Ancajas ug Pasasadaba.
Gitakdang ipaubos sa paraffin test si Roxas ingon man ang iyang amo aron mapalig-on ang kaso nga ipasaka
batok kanila sa piskalya ning syudad.
Samtang gipanghimakak sa driver sa giingong customs broker nga may kalabutan kini sa pinusilay nga nag-resulta sa kamatayon sa police officer ning syudad.
Miingon si Roxas nga gikatingala niini kon unsa’y transaction sa iyang amo ngadto sa customs police nga si Ancajas sa maong lugar kagabii.
Gani,maoy nakit-an lamang niini nga nagka-inilogay sulod sa sakyanan si Ancajas ug Pasasadaba hinungdan nga nagresulta sa pinusilay.
Una niini,nasikop si Roxas atol sa follow up operations sa kapolisan mismo na sa ilang pinuy-anan sa Brgy Balulang ning syudad.
