CAGAYAN DE ORO CITY-Gibutyag sa kauban sa napatay’ng sacristan kinsa nadamay sa pinusilay nga natigayon sa Sitio Cala-Cala,Brgy Cogon,Balingasag,Misamis Oriental nga usa ka pulis ang nakapusil sa 16 anyos nga si Nico Camajalan.
Sumala sa witness nga si alyas Brandon nga nakita niya ang pulis nga nagpabuto sa dalang armas niini samtang pasulod sa ilang balay.
Nanan-aw sila’g salida sa laptop sa dihang nagpabuto ang pulis ug naigo ang ilang kauban.
Gisulayan pa sa iyang mga kauban nga dalhon sa balay-tambalanan ang biktima apan wala sila tuguti sa pulis.
Samtang gipamugos ni Misamis Oriental Provincial Police Office Director Sr/Supt Rolando Destura nga ang target person nga si Baldemiro Pajo maoy nakaigo sa napatay’ng si Nico Camajalan.
Si Destura miingon nga nakapabuto ang pulis nga mi-responde sa crime scene tungod kay nakita niya nga anaa na sa atop nga bahin sa maong balay ang suspek.
Gisalikway usab ni Destura ang posibilidad nga basin nasaypan niini ang menor de edad nga mao ang suspek.
Hisayran nga si Pajo ang mitahan sa kapolisan kaniadto human matudlo nga usa sa mga suspek mi-ambush kang chief of anchors Bombo James Licuanan sa Bombo Radyo ning syudad niadtong Nob 24,2012.
