CAGAYAN DE ORO CITY-Ipabungkag na ni Presidente Rodrigo Duterte ang commercial hub center nga nagusbat pag-ayo tungod sa giyera tali sa militar batok grupong Maute-ISIS sa Marawi City.
Miingon si Presidente Duterte nga gidili na usab niini nga tukuron ang tag-as nga mga gambalay aron dili na magamit sa mga terorista batok sa tropa sa gobierno.
Gibutyag ni Duterte nga andam ang pipila ka bangko sa gobierno aron magpahulam sa pamuhunan sa mga apektadong Maranao-Muslim nga makasugod sa bag-ong panginabuhian.
Nasayran nga anaa sa 70 bilyon pesos ang damyos sa pagsilbing war zone sa commercial hub center dihang gi-atake sa militar ang Maute-ISIS sa Marawi City niadtong Mayo 23, 2017.
Samtang dili angayang mangayo’g pasaylo si Presidente Duterte kon nakasinati sa krisis ang Marawi City.
Kini ang tubag ni Lanao del Sur Vice Governor Bombit Adiong Jr sa subli pagpangayo’g pasaylo ni Duterte dihang gipanguluhan niini ang inagurasyon sa Bahay Pag-Asa Phase 2 sa Marawi City kagahapong adlawa.
Miingon si Adiong nga prioridad lamang nila nga mahitabo sa katawhan sa ilang syudad nga mapadali ang pagtabang sa internally displaced persons o IDPs nga apektado sa giyera tali militar batok grupong Maute-ISIS niadtong Mayo hangtod Oktubre 2017.
