CAGAYAN DE ORO CITY-Gihagit karon sa Associated Labor Unions-Trade Union Congress of the Philippines o ALU-TUCP ang DOLE-10 nga dili magtinalawan pagsumpo sa labor only contracting sa mga kompanya dinhi sa rehiyon.
Kini bisan isip gasa na lamang unta ni DOLE regional director Atty Joeffrey Suyao sa mga trabahante sa Labor Day celebration ugmang adlawa.
Miingon si ALU-TUCP legal officer Atty Proculo Sarmen nga trabaho ni Suyao ang pagsiguro nga panalipdan ang katungod sa trabahante batok sa daghang kasupakan sa labor laws.
Partikular nga gisupak ni Sarmen ang paglikay sa mga kompanya nga ma-regular ang mga trabahante kay gi-agi lamang sa mga agency.
Samtang gipasa na sa DOLE-10 ang mga kompanya nga nakasupak sa labor only contracting nga nagpihig sa katungod sa mga empleyado aron ma-regular sa trabaho.
Kini human gimanduan ni Pres Rodrigo Duterte si DOLE Sec Silvestre Bello III nga ipaubos sa Tokhang ang mga kompanya nga gahi mo-regular sa mga trabahante.
Katin-awan kini ni Vasallo tungod sa batikos sa grupo sa mga mamumuo ug mga progresibong pundok nga walay ngipon ang labor laws nga tuig 1974 pa gipatuman unta sa nasud.
Gani,may mga kompanya na nga gi-kuwestiyon ang hukom ni Suyao nunot sa paghatag protection sa mga trabahante.
