CAGAYAN DE ORO CITY-Himoong testigo sa PNP ang personal driver ni wanted person kanhi Misamis Occidental board member Ricardo ‘Ardot’ Parojinog kabahin sa mga giingong atraso niini sa balaod.
Kini human mismo si Glenn Hernando nga nasikop samtang nagtagu-tago sa Kolambugan, Lanao del Norte ang nagbulgar sa ilegal nga kalihukan ni Parojinog.
Miingon si Ozamiz City Police Station commander C/Insp Jovie Espenido nga si Hernando mismo ang nagbulgar nga daghang tag-as nga mga armas sa underground sa mansion ni Ardot sa Brgy Bagacay,Ozamiz City sa miaging semana.
Kini ang hinungdan nga nakompiskar sa Ozamiz PNP ug RMFB-10 raiding teams ang daghang armas nga gibalhin sa hotel ug security agency ni Ardot sa miaging adlaw.
Nakompiskar sa kapolisan ang laing high powered firearms ug balor P4 milyon pesos nga suspected shabu sa farm nga iya sa business partner ni Ardot sa Ozamiz City.
Miingon si PNP regional spokesperson Supt Lemuel Gonda nga nabawi ang maong duha ka rifle grenades; duha ka 40 MM rifle grenades; M16 nga may M203 grenade launcher ug 1/4 kilo sa shabu gikan sa farm ni Ian Dionson.
Miingon si Gonda nga bugtong ang caretaker ni Dionson nga si Elmer Prenio alyas Kabang ang naabtan sa kapolisan sa Brgy Sangay Dako sa maong syudad.
