CAGAYAN DE ORO CITY-Gitambagan ni City Mayor Oscar Moreno ang mga tawong hilig mag-tambay nga likayan ang paghimo’g kremin sa syudad.
Giangkon ni Moreno nga dili supak sa balaod ang pag-tambay apan kon sagulan sa paghimo’g kremin,basihan kini aron sikupon sila sa kapolisan.
Gihimo ni Moreno ang pasidaan nunot sa sunod-sunod nga pagkasikop sa 96 ka tawo nga nakasupak city ordinance 5133-95 sa syudad.
Nalatid sa ordinansa nga gidili ang pagtambay samtang nag-inom sa pampublikong parke,plaza,daplin sa dalan ug eskinita ilabina sa lawom nga kagabii.
Samtang silotan ug kasuhan kadtong mga pulis o brgy tanods nga mag-abusar samtang mohimo’g ‘tambay-sita’ sa pipila ka tawo sa syudad.
Kini bisan nga dunay mando si Pres Rodrigo Duterte sa pagpatuman niini gamit ang nagkadiayang ordinansa aron pugngan ang nagkadiayang kremin sa panahon sa gabii.
Miingon si City Police Director Sr/Supt Nelson Aganon nga hugot ang iyang bahad sa kapolisan nga likayan ang pagpangabuso aron dili madaot ang mando ni Duterte.
