CAGAYAN DE ORO CITY- I-pukos ni PDP-Laban president Sen Koko Pimentel ang panahon sa pagpangandam sa 2019 midterm elections.
Kini human gibutyag ni Pimentel nga wala hatagi’g gimbug-aton ni PDP-Laban chairman Pres Rodrigo Duterte ang grupo ni Atty Rogelio Garcia nga nagpaila nga bag-ong mga opisyal sa partido.
Miingon si Pimentel nga dili gani halos mailhan sa kadagkuan sa PDP-Laban kon kinsa ang mga miubang kang Garcia dihang sila tagsa-tagsa gipa-atubang kang Duterte sa miaging semana.
Samtang giila sa paksyon ni Garcia nga kadaugan ang pagpatawag ni Pres Rodrigo Duterte kanila.
Kini human ipaabot ni Pres Duterte nga ipasulbad ang padayong bangi ni Garcia ug paksyon ni Pimentel.
Miingon si Garcia nga daw ulawan si Pimentel sa pagtawag kanila nga PDP-Laban ‘expelled’ members kay nakig-estorya sa ilang grupo si Duterte alang sa ikalig-on pa sa partido sa 2019 midterm elections.
