CAGAYAN DE ORO CITY-Nasunog ang unom ka balay diin upat niini ang naabo sa Zone 10,Sitio Impantao,Brgy Bulua sa syudad.
Gibutyag ni SFO2 Dennis Dales,imbestigador sa Bureau of Fire Protection o BFP nga nagsumikad ang kalayo sa pinuy-anan sa negosyante nga si
Galela Jipos ug tag-iya sa pottery shop sa maong lugar.
Miabot sa second alarm ang sunog ug midamyos kini sa kapin-kun-kulang P200-mil.
Blangko pa ang mga bombero sa hinungdan sa sunog.
Samtang wala masayod si Jipos kon unsa ang hinungdan pagkasunog sa iyang pottery shop nga nahimutang sa Zone-10 Impantao,Brgy Bulua ning syudad.
Giangkon ni Jipos nga diriyot na siya malakip kasunog kay wala man siya masayod nga nasunog na ang ground floor sa ilang balay.
Nahimong emosyonal ang biktima human siya na mismo ang gusto mutabang sa bombero aron mapalong ang kalayo nga milamoy sa mga balay sa iyang silingan.
Dugtong niini,tunulan sa tabang pinansyal sa city hall ang mga pamilya nga apektado sa dakong sunog diha sa Brgy Bulua sa syudad.
Miingon si City administrator Teddy Sabugaa nga gipalihok na niini ang CSWD aron mahatagan sa dinaliang pag-atiman ang mga biktima sa maong sunog.
Dugang ni Sabugaa nga angay ipaubos usab sa profiling ang mga apektadong pamilya alang sa paghatag sa dugang ayuda gikan sa dakbayan.
Gialerto usab ni Sabugaa ang katawhan nga dili magpasagad sa ilang seguridad ilabina batok sa sunog aron dili mabutang sa peligro ang mga kinabuhi niini ug mawagtang ang kabtangan niini.
Sa pikas bahin,nasunog ang upat balay ug usa ka tindahan sa Zone 4 Upper Bulua ning syudad kaganihang bandang ala una sa kadlawon.
Gibutyag sa usa sa mga biktima nga si Analou Abella, nagsugod ang sunog sa tindahan sa pamilyang Bonyor ug mitabok sa ilang balay sa Ramada
Compound.
Gitoohang electrical short circuit ang hinungdan sa sunog.
Gibanabana nga moabot sa 50-mil pesos ang damyos sa maong sunog.
