CAGAYAN DE ORO CITY – Giangkon sa Department of Health Region 10 nga nagkataas ang kaso sa dengue sa rehiyon. Kini ang rason kung nganong ilang gidoble ang ilang kampaniya batok sa sakit nga dengue.
Sa tulumanong Good Morning Philippines (GMP), gibutyag ni DOH-10 Registered Medical Technologist Gemma Uy nga sugod pa lamang sa bulan sa Enero 2019, misaka na ang kaso sa dengue taliwala paman nga dili pa ting-ulan.
Siya miingon nga gikinahanglan gayud nga batasanon sa mga residente ang pagpanglimpyo sa palibot aron dili puy-an sa mga lamok nga aedes aegypti, ang carrier sa dengue virus.
Samtang, gipahimangnuan ni Uy ang publiko nga bantayan ang mga lamok nga anaa sulod sa ilang panimalay.
Siya miingon nga ang lamok nga aedes aegypti, nga giingong carrier sa dengue virus mahilig magpuyo sa ngitngit nga lugar.
Dugang pa niini nga aktibo nga moatake ang dengue nga lamok alas 4 sa kadlawon padulong alas 8 sa buntag, ug mubalik kini sa alas 4 hangtud sa alas 6 sa hapon.
Dugtong niini, gi-awhag sa health department ang mga ginikanan nga manglimpyo sa ilang mga panimalay sa maong oras aron makalikay sa makamatay’ng sakit.
