CAGAYAN DE ORO CITY-Gisupak sa Misamis Oriental-Cagayan de Oro Lotto Agents Incorporated o MOCLAI ang sugyot ni Sen Panfilo Lacson nga hingpit wad-on ang Small Town Lottery o STL.
Kini human gibutyag ni Lacson nga halos gikontrol lamang sa mga retiradong military ug police general ang paghupot sa prangkisa sa STL ug dili pagtarong sa pag-remit sa kinitaan ngadto sa Philippine Charity Sweeptakes Office o PCSO.
Miingon si MOCLAI Pres Astrid Bana nga mas maayo nga palig-unon ang STL kay dili sulbad ang pagpasira niini sama sa gisugyot ni Lacson.
Namugos si Bana nga mikusog ang ilang kinitaan ug mihinay ang pagpadagan sa ilegal nga pasugal tungod sa pagkamugna sa STL.Dumduman nga nagpadala na’g sulat ang MOCLAI sa PCSO-Manila aron mabalik sa daling panahon ang pagpadula sa STL.
Samtang bisan si Oro Chamber of Commerce Public Relations Officer Atty Antonio Soriano ang dakong supak nga wad-on ang mga pagpadula sa Small Town Lottery o STL.
Miingon si Soriano nga angay magmatngon si Pres Rodrigo Duterte sa iyang mga ipakanaug nga hukom ilabina nga napalibutan na kini sa mga retiradong military ug police generals.
Namahayag si Soriano nga mas gusto sa daghang katawhan ang STL hinungdan nga angay kining ipadayon ni Duterte.
Uyon usab ang abogado nga angay ipalig-on pa ang mga palisya sa pagpadagan sa legal nga mga pasugal sa PCSO aron dili maabusaran ug tinubdan sa kurapsyon.
