CAGAYAN DE ORO CITY – Misaka pa sa trese ka tawo ang nagpositibo sa 2019 Corona Virus Disease (COVID-19) sa Northern Mindanao.
Sa gilusad nga press conference sa Inter Agency Task Force on Emerging Infectious Disease (IATF-EID), gibutyag ni Department of Health Regional Director Dr. Adriano Subaan nga ang tolo ka mga bag-ong kaso nagsumikad sa Lanao del Norte, Iligan City, ug Misamis Occidental.
Apan gitin-aw ni Subaan nga sa 13 ka mga COVID-19 positive, upat lang niini ang mga molopyo sa rehiyon tungod kay ang siyam pulos imported cases.
Kini nagpasabot nga nakuha sa siyam ka mga pasyente ang ilang impeksyon sa uban rehiyon, ug dinhi nagpahiling sa Northern Mindanao.
Dunay duha ka pasyente ang nagpahiling sa Amai Pakpak Medical Center (Marawi City) kinsa residente sa Marantao, Lanao del Sur.
Milusad na sa contact tracing ang DoH alang sa mga tawong na-exposed sa mga bag-ong COVID-19 positive.
Sa kinatibuk-an, as of March 30 nga data sa DOH-10, pabiling 17 ang ihap sa patients under investigation (PUIs) nga nagnegatibo sa ilang test, kundiin, tolo ang nagpositibo niadto.
