CAGAYAN DE ORO CITY – Gipasaka na sa kapolisan ang kasong murder batok sa mga suspek sa pagpusil-patay sa magsisibya nga si Federico ‘Deng’ Gempesaw dinhi sa dakbayan.
Miingon si Police Maj. Mario Mantala Jr, hepe sa Carmen Police Station nga ilang gipasaka ang kaso basi sa testimoniya sa mga testigo nga positibong mitumbok sa mga suspetsado.
Apan nagdumili una si Mantala sa pagbutyag sa pangalan sa mga gikasuhan aron dili mabalda ang nagpadayon nilang imbestigasyon.
Asoy ni Mantala nga gilayon nilang sikopon ang mga suspek sa higayong ipagawas na sa korte ang warrant of arrest.
Gipusil-patay sa ‘riding-in-tandem’ si Gempesaw gawas sa ilang panimalay sa Sitio Macanhan, Brgy. Carmen niadtong Hunyo 29 ning tuiga.
Hisayrang mitanyag si kanhi gobernador ug karon Misamis Oriental 2nd District Rep. Bambi Emano sa 500-mil pesos nga reward money aron mapadali ang pagsulbad sa kamatayon ni Gempesaw.
