CAGAYAN DE ORO CITY – Gisupak ug gikuwestiyon sa panig sa minoriya ang resolusyon nga nagtugot kang City Mayor Rolando ‘Klarex’ Uy pinaagi sa city legal dept nga mangunay na pagduso’g special civil action batok sa kompanyang Metro Pacific Water-Cagayan de Oro Bulk Water Incorporated (MetroPac-COBI).
Kini bisan kon nakakuha’g sunod-sunod nga pabor ang mga alyado ni Uy sa korte pinaagi sa paglugwa sa temporary restraining order batok pagputol sa tubig.
Miingon si Kag. Ian Achas,lider sa minoriya sa konseho nga walay igong basehan ang gihimo sa konseho aron manginlabot ang dakbayan tali sa COWD- COBI dispute.
Apan alang kang Kag.Edgar Cabanlas,lider sa mayoriya nga interes sa katibuk-an sa katawhan ang pagpanginlabot sa city govt sa maong isyu.
Miingon si Cabanlas nga dili angay ipamolitika ang maong aksyon kay dakong proteksyon sa katawhan ang nag-unang tuyo sa kagamhanan.
Dugtong niiini,gi-depensa ni Uy ang special civil intervention sa dakbayan kontra pagputol sa tubig sa dakbayan.
Kini human wala magustuhi sa pipila ka sakop sa konseho ang pasado nga resolusyon diin nagtugot kaniya nga mohimo’g mga aksyon aron dili na mabalda ang suplay sa panubig sa syudad.
Namahayag ang mayor nga angay lang kini nga buhaton kay sila ang tulisukon sa katawhan kon dili usab magpakabana sa gisabugang nga problema.
Una niini,gisaway ni kanhi City Mayor Oscar Moreno ang gihimong hukom sa grupo ni Klarex.
Siya miingon nga nagpakita lamang kini nga wala sila makasabot sa katibuk-an sa ilang gisudlan nga mga lakang.
