CAGAYAN DE ORO CITY – Gikalipay sa Commission on Elections kuyog ang tropa sa gobierno nga gilakipan sa Philippine National Police o PNP ug Philippine Army nga ‘zero failure of elections’ sa Lanao del Sur.
Kini may kalabutan sa gilusad nga 2025 midterm elections taliwala nga adunay pipila ka lungsod sa probinsya nga ‘red category’ gumikan sa grabe kainit sa bangi sa politika ang mga kandidato.
Miingon sa Bombo Radyo si Philippine Army spokesperson Col. Louie Dema-ala nga tungod sa hiniusang paningkamot sa tanan,nakab-ot ang kahusay’g kalinaw sa pinakaunang higayon sa maong lalawigan.
Siya miingon nga epekto kini sa sayo nga paglusad sa govt forces sa pagbungkag sa private armed groups ingon man gun ban checkpoints rason napugngan ang pagsulod sa mga armado sa matag-lungsod.
Gibutyag ni Dema-ala nga nahangyo usab pagsayo ang political supporters sa mga kandidato nga magmakalmahon taliwala sa kainit sa panagribal sa mga posisyon nga gidaganan sa eleksyon.
Hinoon,giangkon sa opisyal nga nakatala gihapon sila’g pipila ka minimal election related incidents apan wala makahatag sa seryosong pagka-disturbo sa katibuk-ang proseso sa piliay.
Hisayrang sa milabay’ng mga piliay, kanunay’ng mahaigom sa failure of elections ang Lanao del Sur tungod sa pag-atras sa mga magtutudlo nga magsilbing board of election inspectors epekto sa grabeng kahadlok nga maipit sa kagubot.
