CAGAYAN DE ORO CITY – Napun-an pa sa laing medalyang bulawan ang NorMin Stars nga naglangkob sa Northern Mindanao Regional Athletics Association (NMRAA) sa nagkainit nga 65th Palarong Pambansa sa Department of Education nga gitutukan sa Bombo Radyo Philippines sa Laoag City,Ilocos Norte.
Kini human nasakmit sa atleta nga si Francis Joenel Cuabo nga gikan sa Iligan City ang gold medal sa dulang free style poomsae event sa Taekwondo sa nasudnong paugnat sa kusog ning adlawa.
Ang kadaugan sa gold medal ni Cuabo ang maoy ikaduha nga kalampusan sa NMRAA diin unang nahatagan sa katumanan pinaagi ni Kent Gimarangan alang sa long jump nga gikan sa Valencia City,Bukidnon.
Naka-bronze medal usab sa dulang Taekwondo free style poomsae si Krystal Marydane Deguiñon nga gikan gihapon sa Bukidnon.
Hisayrang gilauman nga magsaka pa ang ihap sa mga medalya nga makuha sa NorMin Stars sanglit sobra 600 ka atleta ang gipadala sa NMRAA sa Palarong Pambansa sa Laoag City ning tuiga.
