Napakyas ang minorya sa ilang misyon nga mag-convene ang senado aron mahimong impeachment court ug mudungog sa kaso ni Vice President Sara Duterte.
Na-abtan pa sa gabie sa pagdebate ug paghatag sa ilang manifestation human gisaka nila Senate Minority bloc Leader Koko Pimentel ug Senator Risa Hontiveros ang mosyon aron sugdan na ang impeachment trial.
Miligid sa daghang oras ang debate gumikan sa pinulungang “forth with” ug mga negosasyon nga hatagan sa patas nga gimbug-aton ang posisyon sa duha ka panig sa senado.
Sa katapusan, si Senate President Chiz Escudero nanumpa isip presiding officer sa impeachment court, ug ang mga senador nga maglingkod isip mga hukom sa impeachment court gikatakdang manumpa ning adlawa, Martes, Hunyo 10, alas-4 sa hapon.
Taliwala sa ilang oath-taking isip senator judges, wala pa kini nagpasabot nga opisyal nang nag-convene ang impeachment court.
Ang impeachment trial gikatakdang magpadayon sa Hunyo 11, apan adunay mga senador nga naglaraw sa pag-file sa resolusyon aron ipahunong ang impeachment trial.
Hisayran nga ang Senado aduna nalang tolo ka adlaw nga sesyon sa dili pa ang sine die adjournment sa Hunyo 14.
