Gidominar sa mga Mindanaoan candidates ang indigay sa Binibining Pilipinas 2025, didto sa Smart Araneta Coliseum, kagabie.
Gideklarar isip bag-ong reyna sa Binibining Pilipinas International 2025 si Katrina Anne Johnson, sa Davao City, ug ang Binibining Pilipinas Globe 2025 nasakmit ni Annabelle Mae McDonell gikan sa Iligan City.
Ang Miss Las Pinas nga si Dalia Varde Khattab maoy nahimong 1st runner-up, samtang si Kathleen Enid Espenido gikan sa Siargao napili isip 2nd runner-up.
Ang Davaoeña nga si Johnson nag-standout sa iyang evening wear busa iyang nabulsa ang Best in Evening Gown award.
Samtang si Khattab ang nakapasiga sa mata sa mga hurado human siya ang napili nga mananaug sa Best in Swimsuit.
Sa pagpili sa top 14, ang bag-ong reyna gipangutana bahin sa fake news ug ang iyang tubag nagpalawom sa importansya sa edukasyon ug pagregulate sa impormasyon aron malikayan ang pagkatibulaag sa bakak nga balita.
Samtang si McDonnell, gipangutana kung unsa ang iyang gustong makat-on gikan sa usa ka babaye nga nakit-an nga nigawas gikan sa drainage basin.
Iyang tubag nagpakita sa kusog ug determinasyon sa pagbangon gikan sa kalisod. Ang uban pang kandidata nakadawat sa mga pangutana bahin sa social media, edukasyon, ug papel sa mga beauty queens sa pagpalambo sa nasud.
Ang Q&A round usa sa labing kritikal nga bahin sa kompetisyon, tungod kay kini nagpakita sa kaalam, personalidad, ug abilidad sa kandidata sa pagdala sa korona.
Hisayran nga nasampit nga indigay gisalmotan sa 36 ka kandidata nga nagpakita sa ilang kalantip sa salabutan, katahum, ug nagkalain laing mga mga adbokasiya.
Si Johnson magrepresentar sa Pilipinas sa Miss International 2026, samtang si McDonell magpadayon sa Miss Globe 2025
