Gisusi ni Misamis Oriental Governor Juliette Uy ang mga balay-tambalanan sa lalawigan sa Misamis Oriental, aron personal nga masuta ang kahimtang sa serbisyo medikal sa probinsya.
Ang inspeksyon gibuhat sa nagkalain-laing lugar, lakip na ang First Misamis Oriental General Hospital, diin nakita ang kakulang sa mga kahimanan sama sa dagom, oxygen supply, ug basic medical equipment.
Sa interview sa Bombo Radyo namahayag si Celso Popoy Abucejo, Special Assistant to the Governor, nga daghang pasyente ang nagkinahanglan sa serbisyo apan limitado ang kapasidad sa mga ospital tungod sa kakulang sa gamit.
Gitutukan ni Governor Uy ang maong problema isip prayoridad sa iyang administrasyon, ilabi na kay ang mga balay-tambalanan mao ang unang dangpanan sa mga kabus nga Misamisnon.
Mahinumduman nga sa iyang unang public speech, gisaad sa gobernador nga tutukan niya pagpalambo sa healthcare system sa probinsya pinaagi sa pagpalig-on sa pondo, pagpalit sa kahimanan, ug pagpaayo sa access sa libre nga tambal ug serbisyo medikal.
