Nagbilin sa dakung kabalaka sa mga ginikanan ug magtutudlo ang nahitabong student rumble sulod sa Cugman ug Bulua National Highschool ning dakbayan.
Gibutyag ni Romeo Aclo, Executive Program Head sa Department of Education Region 10, nga dako ang papel sa mga tunghaan sa pagsusi sa kahimtang sa ilang mga magtutungha tungod kay ang bikil nasugmikad sa pagbully sa usa ka batan-on batok sa ilang mga klasmate.
Gipasabot ni Aclo nga dili lalim ang epekto sa bullying sa usa ka batan-on kay mahimo kining hinungdan sa iyang pagbiya sa klase, pag-ubos sa grado ug pagdumili sa paggawas sa puy-anan tungod sa kahadlok.
Tinguha ni Aclo nga kinahanglan mapasabot sa mga tunghaan ang dautang epekto sa mental ug emosyonal nga kapasidad sa teenager ang pagpangbully ug kung unsa ang impact nga mahatag niini sa katilingban, ilabe na sa mga ginikanan sa batan-on nga gibully ug sa nang-bully.
Subay sa record sa DepEd, dili kini gang-related incidents, apan kasagaran personal misunderstandings o ginagmay nga bangi lamang sa mga magtutungha nga napahungaw kay adunay nakakuhag hulagway ug video.
Panawagan karon sa DepEd ang inadlawang pagsusi sa mga ginikanan sa ilang mga anak, pagpasabot sa mga magtutudlo sa dautang nga epekto sa pagbully ug pagtudlo sa mga kabatan-unan nga mahimo silang masikop o mapabarangay sa ilang binuhatan.
