Gipailawom sa surprise drug test ang ubay-ubay nga empleyado sa opisina ni City Mayor Rolando “Klarex” Uy.
Gibutyag ni Agent Expidito Cardona sa Philippine Drug Enforcment Agency Region 10 nga gihimo nila ang drug test agig follow-up sa milabay’ng tulo ka semana nga operasyon sulod sa City Hall.
Miingon si Cardona nga suportado sa Mayor ang ilang lakang ug kaayuhan kini sa mga empleyado.
Hisayran nga ang operasyon maoy tipik sa ilang demand reduction ug harm reduction program aron pamatud-an nga ang public office kasaligan sa katawhan.
Gipanganti ni Cardona nga ang regular nga empleyado nga magpositibo sa drug test ipailawom sa intervention program pinaagi sa Barangay Drug Clearing Program, subay sa direktiba sa mayor.
Apan alang sa mga casual ug job order workers nga magpositibo, posible nga dili na sila tagaan sa higayon nga mare-renew ang ilang kontrata.
