Posibleng walay Kongresista nga kontratista ang malakag sa balaod tungod kay gipaagi lamang sa sabot-sabot ang ilang bahin sa kickback, ug wala ilang ngalan sa dokumentadong flood control projects nga gi-finance sa gobyerno.
Kini ang pagduda ni Engineer Elmer Cotiamco, usa ka lokal nga kontratista sa syudad.
Sa iyang interbyu sa Bombo Radyo, miingon si Cotiamco nga lisod mapanubag ang mga opisyal kay “verbal” lang ang ilang kasabotan, busa padayon ang pag-awas sa ilang bahin sa pondo, tungod kay dili man sila sigantories sa proyekto.
Nagtuo usab ang enhinyero nga walay Kongresista nga kontratista ang mapatawag sa senate hearing kon ang partisipasyon sa mga politiko ang hisgutan, kay ang mga “implementor” sa proyekto sama sa mga district engineers sa Department of Public Works and Highways (DPWH) ang adunay pormal nga kasabutan sa papel tali sa lowest bidder nga construction firm.
Dugang pa ni Cotiamco nga murag wala na’y bili ang proseso sa “public bidding” kay nahimong pormalidad na lang kini o pakitang tawo tungod kay aduna na kunoy napili daan nga kontratista ang mga district engineers.
Sa laing bahin, nanghinaut ug gi-awhag ni Ray Talimio Jr., Co-Chairperson sa Economic Development Committee sa Regional Development Council sa Rehiyon 10 (RDC-X), ang katawhan nga suportahan ang gilusad nga imbestigasyon sa Senado.
Tumong niini nga masayran kung asa napadulong ang buluhisan ug kung natuman ba ang mga proyekto sumala sa nakalatid sa programa sa DPWH nga gipundohan pinaagi sa General Appropriations Act (GAA).
Gipalanog ni Talimio ang kahinungdanon sa suporta sa katawhan sa tanang paningkamot sa gobyerno aron masiguro ang tinuod nga pagpatuman sa maayong pangagamhanan (good governance) sa tibuok nasud.
Pinaagi sa good governance, gilauman sa ekonomista nga ang mga pagdungog sa senado maghatag sa konkretong resulta, aron adunay masilotan, masuspenso, ug mapriso ng mga responsable sa pagwaldas sa kwarta sa katawhang Pilipino.
Una niini, duhay nang namonitor sa grupo ni Talimio ang mga “red flags” sa kontrobersyal nga flood control project.
Gibutyag ni Talimio nga tuig 2022, 2023 ug 2024 nabantayan na nila nga katingalahan na nga miabot sa P1-trilyon ang pondo nga nabubo sa flood control project, itande sa 15 ka tuig nga naglabay sa Pilipinas.
