Gisaway ni Presidential Sister ug Senador Imee Marcos ang nagkatibulaag nga mga pamahayag sa gabinete ni Presidente Ferdinand Marcos Jr kalabot sa “hungihong” nga nakapanaug na sa arrest order ang International Criminal Court (ICC) batok kang Senador Ronald Dela Rosa. Miingon si Marcos nga managlahing bersyon ang iyang nadunggan sa balita ug nagpakita lang sa pagpanghulga sa institusyon sa senado, kung asa kabahin si dela Rosa. Kini ang rason nga gi-awhag sa senador ang mga sakop ni Marcos nga igawas ang warrant kung aduna man, ug maghilom na lang kung wala diha.
Dugtong niini, gisaway usab sa senador ang kalit nga pagsawsaw sa DOJ human niya namatikdan nga aduna nay namugna nga proseso sa pagsurrender kang dela Rosa sa langyaw nga korte, bisan wala pay kompirmasyon sa pagsikop sa senador sa langyaw nga korte. Gipadumduman ni Marcos ang si DOJ Secretary Fredderick A. Vida nga mismo sa baba ni Presidente Marcos nga walay hurisdiksyon ang ICC sa Pilipinas. Namugos si Marcos nga adunay sagol pamulitika ug klaro nga walay due process kung tinood man ang report nga gipangandaman na sa gobyerno ang paghatud kaniya sa The Hague Netherlands.
Gumikan niini, mipasidaan ang senador sa DOJ ug sa Office of the Ombudsman nga kung mahisama ang pagsikop kang dela Rosa kang Kanhi Presidente Rodrigo Duterte, nga walay warrant, dili kini magpanuko sa pagpasaka subli kaso batok sa mga tawong anaa sa luyo sa “extradite” sa senador padulong sa ICC.
