Napun-an sa laing korona gikan sa pinakasikat nga indigay sa kaanyag ang Mehiko gikan sa Ms Universe Organization.
Kini human sakmita ni Fatima Bosch ang ikaupat nga titulo sa 74th Ms Universe sa bag-uhay nga koronasyon nga gihimo sa Impact Challenger Hall sa Pak Kret,Nonthaburi sa Thailand ning tuiga.
Si Bosh ang mipuno sa listahan sa Mexican beauty queens nga nakahimo’g kasaysayan sa Ms Universe nga unang nahimo ni Lupita Jones sa tuig 1991;Ximena Navarrete sa 2010 ug Andrea Meza sa 2020.
Maoy nagsilbing 1st runner up ni Bosch ning tuiga ang host country Thailand,2nd runner up ang Venezuela,3rd runner up ang Pilipinas pinaagi kang Ahtisa Manalo ug ikaupat ang gikan sa Cote D’ Ivoire.
Si Danish beauty queen Victoria Kjaer Theilvig gikan sa Denmark ang mipasa sa korona ngadto sa bag-ong Ms Universe title holder nga si Bosch.
Una niini,usa ka komon nga pangutana lamang ang gihatag sa mga hurado nga gipuli-puliha’g tubag sa final 5 candidates diin ang unod sa tinubagan ni Bosch ang miani’g kumbinsidong pabor aron sakmiton ang 4th title sa Ms Universe 2025 coronation.
Si Manalo ang gilauman unta nga modugang sa titulo alang sa Pilipinas nga nahimo na nila ni 1969 Ms Universe title holder Gloria Diaz;1973 Ms Universe Margarita Moran;2015 Pia Wurtzbach ug Catriona Gray sa 2018.
