Girekomendar ni Police Fire and Public Safety Chairman, Konsehal Roger Abaday, sa unang session sa Cagayan de Oro City Council sa tuig 2026 ang pagpahigayon sa OPLAN LIGTAS BYAHE ug pagpatuman sa random breathalyzer checkpoints. Sa intebyu sa Bombo Radyo, mipasabot si Abaday nga ang nag-una nga hinungdan sa mga natala nga vehicular accidents sa syudad mao ang mga drayber nga ubos sa impluwensya sa alkohol, mga nagdali-dali’g pauli, sobra sa kakapoy o stress ang pagbiyahe sa dalan. Lakip usab sa iyang gipunting ang mga road racing nga makasamok sa karsada ug mga illegal parking nga nagdugang sa posibilidad sa aksidente. Gihangyo karon ni Abaday ang lokal nga kagamhanan nga magpalit sa portable breathalyzer units, nga gamiton sa mga kapulisan ug traffic officers sa mga road checkpoints o random inspections aron masusi ang lebel sa alkohol sa lawas sa usa ka drayber pinaagi sa iyang gininhawa.
