Nagpakita sa kasuko ang mga Greenlander batok sa pahayag ni US President Donald Trump nga kuhaon ang ilang yuta. Para kanila, ang Greenland dili kabtangan sa Amerika, kun dili yuta nga iya sa mga Greenlander. Ang hulga nga mahimong sakop sa Estados Unidos nagdala og dakong kabalaka, kay possibleng mawala ang kultura ug ang libre nga mga serbisyo sama sa edukasyon ug panlawas. Nailhan ang mga Greenlander nga mahigalaon ug malinawon. Dili sila mahilig sa gubat, ug labaw sa tanan, dili sila mosugot nga basta-basta lang angkonon sa laing nasud ang Greenland. Ang ilang baruganan klaro, ang ilang yuta ug pagkatawo kinahanglan respetohon. Imbis nga mapaduol ang Greenlander sa Amerika, mas napalayo hinoon sila tungod sa kakulang sa respeto sa ilang identidad ug kahimtang. Ang mensahe sa katawhan sa Greenland lig-on ug walay pagduha-duha: ang Greenland iya sa Greenlander, ug dili kini ikabaligya o ikahatag bisan kinsa. (JANE ABULAG)
