Mihimo’g public apology ang Cogon United Market Vendors Association (CUMVA) President nga si Franklin Dagcota kalabot sa iyang mga pahayag mahitungod sa giingong kaso sa leptospirosis nga kuno nakaresulta sa pagkamatay sa mga mamaligyaay sa Cogon Public Market.
Ang iyang pagpangayo og pasaylo natigayon atol sa committee hearing kagahapong adlawa, nga gipangulohan ni Councilor Paolo Nicolo Gaane, chairman sa City Council Committee on Health and Health Insurance.
Giangkon ni Dagcota nga walay lig-on nga basihan ang iyang naunang pahayag nga adunay napulo ka vendors nga namatay tungod sa leptospirosis, hinungdan nga nangayo siya og pasaylo sa publiko.
Iyang giila nga nakapadala siya og sulat ngadto sa City Council bisan wala pa masuta ug mapamatud-an kung leptospirosis ba gyud ang hinungdan sa mga kamatayon.
Atol sa hearing, giklaro nga fake news ang giingong leptospirosis cases sa Cogon Market tungod kay wala’y factual nga ebidensya ug opisyal nga dokumentasyon.
Gipamatud-an usab sa Department of Health (DOH) nga wala’y na-report nga kaso sa leptospirosis sa Cagayan de Oro City, ug gipahinumdoman ang publiko nga ang pagpagawas og dili beripikado nga impormasyon supak sa Republic Act No. 11332. (James Oliver)
