Nahuman dayon sulod sa duha ka oras ang unang hugna sa peace talks sa Russia ug Ukraine sa Geneva Switzerland.
Unang namahayag ang peace negotiator sa Russia nga si Vladimir Medinsky nga nagkalisud sila sa negosasyon ug taas ang tsansa nga malangan pa ang proseso sa sunod dayalogo.
Wala na mihatag sa petsa ang Moscow Government kung kanus-a sila mubalik sa negotiating table.
Sa pikas bahin, namugos usab si Ukraines Chief negotiator Rustem Umerov nga anaa na sa pinal nga ang-ang ang kasabutan, ilabe na sa mga probisyon sa ilang mga kondisyon nga ipatuman aron mulungtad na ang kalinaw sa duha ka nasud.
Ang negosasyon sa duha ka kampo, gipataliwalaan sa Estadus Unidos pinaagi ni US special envoy Steve Witkoff ug Jared Kushner.
Lakip sa natuki nga mga isyu ang inilogay sa teritoryo, energy security, ug kung kinsa ang mokontrol sa Zaporizhzhia Nuclear Power Plant.
Bisan pa sa giingon nga “meaningful progress” sa pipila ka bahin, nagpabilin nga walay klarong kasabutan ang duha ka kampo, nga pulos gi-angkon sa duha ka negosyador.
Hisayran nga upat na katuig ang gubat sa Russia ug Ukraine gumikan sa land dispute.
