Gipaniguro sa Armed Forces of the Philippines (AFP) ug ang Department of National Defense (DND) nga makatulog sa hapsay ang publiko taliwala sa nagpadayong tensyon sa Middle East.
Kini ang girantiya ni AFP Spokesperson to the West Philippine Sea Rear Admiral Vincent Trinidad, samtang nagpadayon ang ilang monitoring sa sitwasyon sa Gulf Region.
Miingon si Trinidad nga mas nakapukos ang nasudnong puwersa sa pamaagi nga maluwas ang tanan Overseas Filipino Workers (OFWs) nga gustong mamauli sa Pilipinas.
Sa pagkakaron, gitin-aw ni Trinidad nga nagpabiling opsyon ang repatriation ug wala pa mipatuman ang gobyerno sa pugsanong pagpabakwit kanila sa mga gubot nga nasud sama didto sa Israel ug Iran.
Sa pagkakaron nakigkoordinar na ang AFP sa Department of Foreign Affairs (DFA), Department of Migrant Workers (DMW), ug Overseas Workers Welfare Administration (OWWA) aron masiguro ang luwas nga agianan sa mga distressed OFWS.
