Gihangyo sa Department of Energy (DOE) ang publiko nga magtipid sa paggamit sa lana tungod sa kawalay kasiguruhan sa suplay sa petrolyo taliwala sa nag-lalom nga tensyon sa Middle East.
Gipasabot ni DOE Secretary Sharon Garin nga ilang gitubag ang isyu samtang naglaum sa labing maayong resulta, apan nag-andam usab sa pinakagrabe nga sitwasyon nga gitawag nilang “pragmatic optimism”.
Subay sa direktiba ni Presidente Ferdinand Marcos Jr, gisiguro ni Garin sa mga Pilipino, mga motorista, ug mga negosyo nga magpabilin nga igo ang suplay sa petrolyo sa nasud.
Nag-presentar usab ang DOE sa mga pamaagi sa ‘fuel efficiency’ ug pag-pakunhod sa gasto nga ipatuman sa tanang ahensya sa gobyerno, lakip na ang Government-Owned and Controlled Corporations (GOCCs), State Universities and Colleges (SUCs), ug Local Government Units (LGUs), aron makab-ot ang tumong sa Government Energy Management Program nga makapamenos sa konsumo sa lana nga dili moubos sa 10%.
