Gipangayo ni Kagawad Antuy Pascual ang dali nga aksyon sa mga otoridad kabahin sa problema sa daghang langaw nga nagpalibot sa pipila ka panimalay sa Barangay Lumbia.
Matud pa niya, nagsugod ang reklamo niadtong Setyembre sa miaging tuig gikan sa usa ka residente sa Navona, apan wala dayon makahatag og update ang City Health Office.
Tungod niini, ang barangay mismo ang nanglihok ug gipasa ang concern sa Department of the Interior and Local Government aron matutukan ang maong isyu.
Gipasabot ni Pascual nga posibleng inter-LGU ang problema, tungod kay ang ginatuohang gigikanan sa langaw anaa sa Baungon, Bukidnon, samtang ang apektadong mga panimalay anaa sa Lumbia, Cagayan de Oro.
gikinahanglan ang interbensyon sa city government aron mapalig-on ang koordinasyon tali sa duha ka lokal nga panggamhanan alang sa husto ug paspas nga aksyon.
Gikabutyag usab nga sa ilang miting kagahapon, gisugyot nga imbitaron ang Environmental Management Bureau aron masusi pag-ayo ang sitwasyon.
Sila ang adunay otoridad sa pagmonitor sa environmental standards ug sa paghatag og clearance sa mga establisyimento. Nahibaluan nga nagsugod pa niadtong 2023 ang pagdagsa sa langaw sa maong lugar ug hangtod karon padayon nga ginapangitaan og konkretong solusyon sa mga otoridad. (Jane Abulag)
