Gipasiugdahan ni Presidente Ferdinand Marcos Jr. ang “Trabaho at Negosyo”, usa ka programa nga nagtinguha sa pagpalig-on sa trabaho ug pagsuporta sa mga MSMEs pinaagi sa job fairs, upskilling/reskilling, ug mentorship sessions kauban ang gobyerno ug pribadong sektor.
Gibug-atan usab sa programa ang pag-angay sa mga trabahante ug negosyante sa teknolohiya ug AI aron mas mapalambo ang ilang abilidad sa bag-ong merkado.
Kauban niini, ang sugyot balaod nga “Green Industrial Zones” o House Bill No. 3112, nga nagtumong sa pagtukod ug eco‑friendly nga industrial zones ug naglaum sa P5 bilyon nga pondo, gi-aprubahan na sa committee level sa House of Representatives ug padayon sa legislative process.
Ang balaodnan nagtinguha sa pagpalambo sa limpyo nga industriya sa mga underdeveloped nga rehiyon ug sa paghimo ug mga trabaho sa renewable energy, sustainable manufacturing, ug ubang green industries. (by Jane Abulag)
