Gitun-an pa sa economic manangers ni Presidente Ferdinand Marcos Jr., ang pagpangita’g alternatibong supply sa lana sa Pilipinas.
Gihimo sa presidente ang pahayag human sa iyang pagtambong sa United Nations General Assembly sa New York, Estadus Unidos.
Namahayag si Marcos nga usa ang Asya sa ilang gitun-an nga kuhaan sa bag-ong supply sa lana, apan wala pay pormal nga abiso kaniya kalabot niini.
Una nang namahayag ang Department of Energy (DOE) nga ang reserba sa lana sa Pilipinas anaa lamang sa 60 ka adlaw ug girekomendar ang mga oil companies nga patas-an pa ang ilang oil reserve sulod sa 90 ka adlaw.
Alang kang Marcos, nagsilbing dakung leksyon ang hitabo sa Middle East alang sa mga nagdepende nga mga nasud sa ilang lana.
Gitug-an usab niini nga nakighinabi siya sa ubang mga kanasuran aron masayran kung pila ang presyo sa lana ug mahimong ma-import sa Pilipinas.
