Itugyan na sa Office of the Ombudsman ug Department of Justice (DOJ) ang tanan ebidensya nga nakolekta sa Senate Blue Ribbon Committee kalabot sa ilang imbestigasyon, human sa pag-presentar sa report sa plenaryo sa Senado.
Sumala ni Committee Chairman Senator Ping Lacson, gi-andam na ang transmittal letter aron pormal nga mahatag sa mga awtoridad ang kompleto nga ebidensya, lakip na ang mga dokumento, testimonya ug transcript of stenographic notes.
Gipatin-aw usab sa Senador nga gihimo niyang pampubliko ang bahin sa report pinaagi sa privilege speech aron magamit na sa mga awtoridad ang mga dokumento nga dili makalapas sa lagda sa Senado.
Ang partial committee report naglakip sa reform ug referral package nga tumong nga palig-onon ang gahum sa Ombudsman ug DOJ. (phillip ariata)
