Gipasabot sa City Information Officer nga si Jade Adeser ang tulo ka rason nganong wala makadawat og city allowance ang mga kapulisan gikan Oktubre 2025 hangtod Marso 2026.
Una, giingon ni Adeser nga adunay kakulang sa koleksyon sa siyudad. Bisan pa og mokabat sa walo ka bilyon pesos ang annual budget, unom ka bilyon pesos lamang ang aktuwal nga nakolekta sa LGU.
Kini maoy hinungdan sa pagka‑delay sa ubang operating expenses lakip na ang allowance sa kapulisan nga mokabat og kapin 2.5 milyon pesos matag bulan.
Ikaduha, nakaapekto ang pagretiro sa kanhi city treasurer ug ang transition ngadto sa bag‑ong treasurer, hinungdan sa paglangan sa processing ug pag‑ilis sa mga signatories sa dokumento.
Ikatulo, giingon niya nga adunay pipila ka bulan nga daan nang delayed ang pagpagawas sa allowances bisan pa sa miaging mga panahon, apan nadawat ra gihapon sa mga personnel.
Gikapasalig ni Adeser nga posibleng ma‑release na sa sunod semana ang allowances ug dili na kini molapas pa sa bulan sa Mayo.
