Gibarugan sa Mindanao Power Consumers Federation (MINPOCOF) ug sa Diocese of Iligan ang ilang pagsupak sa planong privatization sa Agus‑Pulangi Hydroelectric Power Complex tungod sa posibleng pagsaka sa presyo sa kuryente ug pagkawala sa kontrol sa gobyerno sa maong bahandi.
Sa interbyu sa Bombo Radyo, gipadayag ni Dr. Melchie Ambalong, chairman sa MINPOCOF, nga dili angay isurender sa gobyerno ngadto sa pribadong kumpanya ang usa ka dakong tinubdan sa enerhiya nga para unta sa katawhan sa Mindanao.
Matod niya, kon ma‑privatize ang Agus‑Pulangi Complex, posible nga mas motaas ang electricity rates tungod kay profit o kita ang unang hunahunaon sa mga pribadong kumpanya.
Dugang pa ni Ambalong nga ang Agus‑Pulangi Complex nagahatag og kapin siyam ka bilyong piso nga income matag tuig, nga igo na unta alang sa rehabilitasyon ug maintenance sa maong planta nga wala kinahanglana ang total privatization.
Gipasabot usab niya nga kinahanglan gobyerno gihapon ang magpabilin nga adunay ownership, management ug control sa hydroelectric complex samtang himuon lamang ang rehabilitasyon pinaagi sa phased implementation aron malikayan ang grabe nga brownout sa Mindanao.
Nanawagan karon si Dr. Melchie Ambalong sa national government ug Kongreso nga isalikway ang tanang proposal sa privatization sa Agus‑Pulangi Complex ug ipadayon ang pagpanag‑iya niini alang sa interes sa katawhan.
