Gikaulaw sa Integrated Bar of the Philippines ang posibleng maot nga impresyon sa international community human sa nahitabong pagpabuto og armas sulod sa Senado niadtong Miyerkules sa gabii.
Namahayag si Atty. Allan Panolong, national president sa IBP, nga mikaylap na sa international media ang maong insidente, lakip na sa pipila ka dagkong news organizations, nga nakahatag og dili maayong tan-aw sa nasod.
Matod niya, usa sa dakong pangutana karon mao kon giunsa pagpasulod ang armas sa usa ka lugar nga nailhan nga hugot ug istrikto ang seguridad sama sa Senado.
Gipasabot usab ni Panolong nga kasagaran hugot ang verification sa mga bisita sa maong institusyon, busa kinahanglan gyud matuki pag-ayo ang nahitabo.
Dugang pa niya, posible nga magmugna kini og negatibong impresyon sa ubang nasod, ilabi na sa aspeto sa seguridad ug pagdumala sa mga importanteng institusyon sa gobyerno.
Busa nanawagan ang IBP nga paspasan ug palawmon sa mga otoridad ang imbestigasyon aron matubag ang tanang pangutana ug mapanalipdan ang kredibilidad sa nasod sa international community.
