Gikompirmar sa health ministry sa Uganda ang tulo ka bag-ong kaso sa Ebola, hinungdan nga misaka na ngadto sa lima ang kinatibuk-ang ihap sa natakdan sa maong nasud.
Tungod niini, mas gipahigpitan nga contact tracing, ug gideklarar usab sa World Health Organization (WHO) ang pagpamatuod sa maong talagsaong ‘Bundibugyo strain’ isip usa ka public health emergency.
Ang tulo ka bag-ong natakdan sa Uganda naglakip sa usa ka drayber, usa ka health worker nga miatiman sa unang pasyente, ug usa ka babaye gikan sa Congo nga nakasulod sa nasud sa wala pa nagpositibo sa virus.
Sa pagkakaron, hugot nga gi-monitor sa kagamhanan ang tanang mga tawo nga nakaduol sa mga pasyente, dungan sa pag-awhag sa publiko nga magmabinantayon ug i-report dayon kung duna may makit-ang mga simtomas. (riza budlao)
